幸福摩天輪 ♥ Hand made 造型蛋糕 (含製作過程)－♥平民宅夫妻的生活日誌♥

用張封面圖呃下人先
E個唔係我整的蛋糕啦
係團購的照片(呃到我去上堂)
團購買的課程聽人講質數參差
所以我買的時候都定心理準備
不過見平平地就試下啦~
同埋我見有D朱古力裝飾同忌廉唧花
自己係屋企整蛋糕都未試過
就當去學下D技巧啦~

七點鐘上堂
放工要即刻去了
去到台上每個位都已經放了一份材料

八角形的模放好在牛油紙上
對好位置(邊邊不要出左牛油紙的外邊)

餅乾碎再加牛油溶液攪拌好
倒在餅模裡

平均攤平在餅模裡,壓實(以防餅底容易散開)
當我好努力去壓實餅底的時候
我旁邊有位大姐
佢無端端好惡講左句:得啦!唔好再壓啦!
你壓得太實好難食架
我呆左望著佢
三唔識七的人惡死能登咁教我整餅喎~
我同事見我嚇親同埋驚我傷心
就打圓場咁講:你親手整的實好食啦~
我心唸:我自己整蛋糕仲多過上堂
我緊係知個餅底壓實D個蛋糕先穩陣
唔係動兩下就散架啦
同埋我的蚊支力邊有可能壓到個餅底好難食啊~

到下一步
甜忌廉打發至七成
八成也可以
不過啊SIR話打到七成MOUSSE口感會滑D
可為七成?
打到反轉都唔跌落嚟就係了~
我都驚打到過左龍
所以打幾下就CHECK下D忌廉跌唔跌落嚟XD
打到有少少輕微有紋路的時候
我旁邊的大姐又出聲了:
夠啦,打夠啦(又係D好惡的語氣...
我打斜少少個盆
D忌廉仲動架
啫係未得啦
好想打多幾下
但是比大姐睇住
如果我打多幾下會唔會又比佢話架 > <
跟住啊SIR剛好行過
我問啊SIR打好未
啊SIR:仲欠少少,打多兩下啦
我細細聲咁同啊SIR講:我都覺差少少先OK
啊SIR叫到
終於可以打反好D忌廉