法國巴黎 (Chez Edouard 法國大餐 Galeries Lafayette 老佛爺百貨公司) 2012年9月 @ ♥平民宅夫妻的生活日誌♥

離開羅浮宮我們去了Place Edouard VII 這個以劇院建築為主的廣場
(資料由網上找出來的,很多食團餐的都來這裡)
Chez Edouard 餐廳就位於這裡
個個都好興奮哦~
我同老公都第一次食法國菜哦~
不過導遊已經預先講定
唔會好似傳統的法國菜食幾個鐘
同埋食好多碟不同的菜

每張台都預先放左支紅酒

cheer~
雖然平時都唔飲開酒
我都有少少嚐試了一口
不過真係飲唔到多一啖...
小孩子的口味

枱上有兩個高腳杯
各倒入紅酒及清水(我們都係亂倒的,無分到邊一個係紅酒杯XD)

龍蝦湯
比想像中的稀
好似溝左水咁
同埋唔算好熱囉~
麵包粒浸淋左 (應該係話原本都唔脆,硬硬地咁)

鵝肝醬配沙津
估唔到會比咁大塊的呢
未食過鵝肝醬
仲好怕會接受唔到陣味
(因為我平時係不吃豬膶,牛什之類的東東,覺得好像苦苦地,又壓壓地咁)
點知試左一細啖又ok喎
食落咸咸地,又帶有少少肉香
質地好像抹麵包的牛油咁

抹滿在硬法包上
法包都變得香口左
老公就話鵝肝醬好滑
好似雪糕咁
我就覺得似芝士多d
話哂鵝肝醬都係咸架嘛~

香橙鴨
新鮮熱辣上枱
好引起人食慾的樣子
原隻油炸鴨腿
上面淋上了鮮橙煮成的醬汁
配菜是幼豆角
仲有由新薯切片而成的炸薯塊~
鴨腿骨很幼的一條,其他全都是肉了
我除了吃下炸到乾身,微脆的鴨腿表面
再食多幾啖鴨肉(好唔慣d鴨肉味,係咪即是"蘇"味呢?)
已經膩到吃不下了

蘋果批
唔係熱上的
不過都很好吃~
吃甜點係用另一個胃
所以我吃哂整件蘋果批呢~

行反出大街上旅遊巴
見到條內街行人不多
唔怕比人偷/搶野
終於可以係法國街頭影反張相啦~

下午係自由活動時間
原先係安排我們去參觀凡爾賽宮的
不過要自費比車費(旅遊巴)同入場費
導遊報個價比我們車費仲貴過入場費囉
所以大部分團友都唔去了
亦有部份團友在昨天的全日自由時間自行去左參觀
因為昨日個個都買左one day pass嘛
不去白不去
我們因為冇做到d咩資料搜集
不懂得去逛下凡爾賽宮
所以昨天全日都係行d 熱門的shopping熱點多
為怕我們買唔夠野
導遊安排車反我地去老佛爺百貨附近
給我們行個夠
今次仲比左4個幾鐘我地行tim啊 > <
團友們個個都怕跟團時的購物時間不夠
早早在昨天的full day自由行已經買哂想買的法國名牌野
現在比四個幾鐘我們真係唔知點打發好...
一落車我們問左導遊春天百貨係邊
就去逛下好了
同老佛爺真的相距不遠
都唔知行左五至十分鐘就到左lu
好行好多啊~(可能老佛爺地下個層裝修緊的關係啦)
人流少老佛爺少少
各大名店一樣都不少
唔洗排隊入內
不過我估比錢個陣都要等架啦~
燈光又光猛
我們得閒到入左MIU MIU幫家姐問下佢想買的銀包幾錢
不過搞完一大輪因為家姐都未選定款而唔買住
仲有馬卡龍專門店
不過我們食完法國餐大飽的關係
真係食唔落
就冇買到LU
D甜點好靚架
不過我唔敢影相
怕比人罵 > <
明明逛緊唔逼人的百貨公司
係路中心都比人撞到應一應
我和老公都即刻互問有冇唔見野
我就緊冇事啦(我去到邊都抱緊個手袋呢)
而老公都冇唔見野
不過佢話感覺到個外國胖妞摸左佢腰條一下
可能係想試下佢警覺性高唔高
從而去偷佢野
百貨公司D貴貴野我們都睇左幾日
我們就試下出室外行下街
左穿右插行完一大輪又反老佛爺

男子館不知名的一層中間有條露天天橋可以行反到本館
又冇咩行人

可以用好靚的角度同歌劇院合照呢
仲撞到其他團友都係逛無可逛
唔知做咩好
在老佛爺百貨公司的三樓/四樓?
百貨公司中間係中空的地方
旁邊的圍欄邊有幾套梳化可供休息
仲有水機唔洗錢,可以喪飲水
見到有旅行團用來做集合地點呢~

企在圍欄邊往上看還可以影到的老佛爺拱型天花

同埋最底層下方的各大品牌的彩妝專區

老公唔願繼續行
我唯有放底佢係坐係梳化休息下
而我就係百貨公司入邊周圍去探險
係某一層的某一部分(真係好細的一個櫃位)
終於比我揾品牌Agnes b啦~
但是真係冇野好買囉
之後唔心息層層都睇下仲有冇另一個Agnes b櫃位
-1 地庫都逛埋但是都冇冇哦

見到LV....好多品牌都超多人排隊
Longchamp 春天同老佛爺百貨都有
前者唔洗排隊入去同埋款式齊(比Le Bon Marche百貨公司多款)
後者多人排隊到呢,比錢又要排多次,仲有特別版賣 > (不過我唔識欣賞囉)
不過比我發現到個好地方
6/F 在百貨公司最高層
係餐廳及賣飾物手信的地方

有條樓梯喎
無聊咪上去睇下囉(見條樓梯幾光鮮,我先敢行上去咋)
7/F 原來係老佛爺百貨的天台啊

仲會見到拱型天花的頂部呢~

因為巴黎的樓宇都不太高
所以景觀好開揚

對正的歌劇院同埋遠處的巴黎鐵塔都看得很清楚呢

天台設有酒吧及小食亭
仲有小攤檔賣窩夫和乳酪雪糕呢~
價錢同香港差不多
味道又不太特別就冇買來吃了

天台周圍擺放了不少的椅子
可供遊人吹住涼風下吹水XD

晚餐又係去反老佛爺超市的海鮮部
唔信邪 (上次點錯野)
來巴黎點都要食一次海鮮拼盤!!
都係點左是日推介 Plateau d'Ëlice $19歐
不過menu上面有幾樣items
- 3 Huitres FInes de Claire N3
- 3 Crevettes roses cuites de Madagascar 30/40
- Grevettes grises
- 3 Bulots cuits
- 1/2 Homard cuit
斷估應該是指拼盤上不同的海鮮

落左order之後
侍應除了籃麵包
仲擺埋個鐵架係枱

今次真係冇點錯野啦 (感動流淚)

我們點的海鮮拼盤份量唔係好多
不過勝在咩都有D
對於我和老公就剛剛好啦~
因為我們平時都好少食海鮮
剝殼都考起我們

中間小碟上有多達數十隻五毫子大小的小蝦
老公厭麻煩唔鐘意剝殼
等我剝殼/腳比佢食啦~
上網聽人講話D肉好鮮甜架
一粒都不能少吃
真係好鮮甜哦
而且蝦殼不太硬
好容易就剝到了

生蠔,翡翠螺及大蝦各三隻
雪一聲就吞左隻生蠔
發生咩事?
我只記得好海水味
唔會覺得反胃囉XD (唔迫形容咁多,因為我好少食海鮮的)

仲有半隻龍蝦
啖啖肉哦~
D肉係一梳梳架
外國唔興幫客人預先扑碎少少個殼先架?
我們又唔識法文
問唔到有冇野可以幫我們扑開個殼少少...
搞到老公好辛苦先NEW到鉗入面D肉出來比我食

拼盤上還有兩款醬汁 (用有獅頭的小碗子盛載,好可愛哦~)
紅醋(酸到冇朋友)及沙律醬(點左之後覺得海鮮的味道豐富左,香左同滑左)

我們仲撞到團友係度買生蠔反酒店食TIM啊~
海鮮部職員將刨冰PACK成一個特大面盆咁
上面插滿大約三十幾隻生蠔
好壯觀哦~
好彩仲比埋保溫袋保鮮
唔係點抱住盆生蠔反酒店啊?