焦糖雞蛋布丁造型蠟燭 (附製作步驟)－♥平民宅夫妻的生活日誌♥

2012-6-17 (日)
三月購買的團購-甜品造型蠟燭製作課程
BOOK極都BOOK唔到
堂堂都FULL
由月頭等到月尾
終於BOOK到了
最後BOOK左6月上堂
嘩~成三個月之後呢~
到上堂前幾日
才醒起上堂當日係父親節喎

我們幾個要上堂的人都唔係好知
好彩DAD冇咋我型咋~
上完堂反屋企切蛋糕就可以了~
由地鐵站行去工廠大廈
雖然唔係好長的路程
但是都足以令到我們成身痴立立
D升降機好恐怖啊 > <
要人手去拉個閘的舊式貨"車立"
上去到燈光都幾暗
要按對講機等入面的工作人員開門
才可以入到好多間隔的地方

有好多條不同的走廊
好多度門
如果我冇估計錯呢
這些就是所謂的迷你倉啦~
找到其中一個單位
原來就是我們上課的地點
好彩我們一行五個人一起去上堂
唔係單身女士自己去
環境都幾惡劣
因為上一堂還未完結
我們要在走廊等了大約十分鐘的時間
真係好熱啊
冷氣都冇
又大麈灰灰暗暗咁

終於入得去啦
不過地方真的不大
好像一個酒店套房入面的獨立廁所的大小
放了很多小擺設

還有明信片,海報等等......

導師首先給了我們選
我地想學整的蠟燭樣本
今次我們整的製成品有兩樣
一) 小蠟燭
左上的小啫喱/花形蠟燭(二選一)
二) 甜品造型蠟燭
有四個選擇
A) 左下的雜果刨冰蠟燭
B) 右上的冬甩及迷你果撻蠟燭
C) 右下雜莓撻蠟燭
D) 焦糖雞蛋布丁蠟燭(忘記拍照)
而刨冰和焦糖雞蛋布丁蠟燭
因為唔方便帶攜帶
就會連埋個玻璃碗/碟帶走的
唔洗加錢架~
一聽到包埋玻璃碟
我地幾個女仔即刻雙眼發光
最後剛好全體選了整焦糖雞蛋布丁蠟燭

首先整小蠟燭先
因為較易入手
我地又係全部人都選花花模
每人選一個乾淨D模

因為有上一手整完的蠟係度
我們要用紙巾抹走哂佢
之後用掃掃上BABY油
咁係為左方便甩模的

之後導師會每人派一杯仔已煮溶的熱蠟
唔好睇好似水咁啊
隔住個紙杯都辣辣地手架
加入香油及色粉拌勻
我想整紫色同埋加左提子味香油
花花蠟燭就差不多完成了

之後到整焦糖布丁蠟燭
由於地方所限
(真係好迫,
除左我地五個人仲有另外兩個女仔同埋導師,
TOTAL八個人迫埋係間細鈿細房到)
又急住做幾個步驟
所以我都漏影左幾張相
我唯有用文字講解下
每人一個布丁模
今次唔洗搽BABY油啦
因為係植膠模呢既
跟著導師又分左D熱蠟給我地去溝色
整左棕色出來
倒入布丁模入面
跟住再整黃色的布丁
加埋香油,我今次選左朱古力味
導師話唔好每樣野都加不同香油
因為咁樣最後整出來的蠟燭
香味會變得濁架
再倒入已經有棕色布丁的布丁模入面
之後我們開始整生果
又係一人一杯熱蠟
因為係整藍莓
所以就要加藍色同紅色的色粉去溝隻紫藍色出來
不過藍色落得好似多左D
睇落似黑藍色咁
之後導師就叫我們起勢用雪條棒搞拌
搞到起粒粒
同埋放在手上唔會辣手仲有微
要可以NEW起適量係手到初到圓形

之後用畫筆尾係藍莓度吉個孔出來
藍莓就完成啦
有D奇怪好似弱智的
藍莓粒粒都唔同形狀XD

士多啤梨係導師隨意找我們其中一個去整
因為一個模已經可以整好多粒
用的係整朱古力的士多啤梨型模
裡面搽一層BABY油
倒入已溝色的熱蠟
待涼就可以脫模啦~
睇下你想裝飾時用原粒士多啤梨或者半粒
可以趁士多啤梨裡面還暖的時候切開
涼透的話就算大力士都切唔開架啦~

趁我地整水果的時候
導師替我們的花花蠟燭脫模
再加上燭芯
左上的黑藍色的蠟燭就是我的

點解會咁架
邊有花朵係豆豉色架 > <

到布丁蠟燭的最後步驟啦
就係整刨冰
乜平時我們食布丁會連埋刨冰一齊食既咩?
我估應該係為左固定布丁同生果而去做掛...
導師又係每人派了一杯熱蠟
因為布丁和生果都有幾隻顏色了
我一時也想不到用甚麼顏色才襯
所以我就甚麼都不加
照蠟原本的顏色作刨冰好了
又係用雪條棒搞到熱蠟起結晶(刨冰)
鋪在玻璃碟上
趁暖放上布丁和生果(布丁導師已經替我們脫模加上燭芯)
待涼就會固定好所有裝飾
大公告成~